வீடியோ: சாலை நெரிசலை குறைப்பதற்கென சீனாவில் கார்களை விழுங்கியபடி செல்லும் சாலை ஏர் பஸ் வெள்ளோட்டம்
சீனாவில் அதிகரித்துவரும் காற்றுமாசு மற்றும் போக்குவரத்து நெரிசலுக்கு தீர்வுகாணும் வகையில் நவீனரக டிராம் வடிவ பஸ்களை அறிமுகப்படுத்துவதற்கான முதற்கட்ட முயற்சிகள் தொடங்கியுள்ளது.
60.60 மீட்டர் நீளம், 7.80 மீட்டர் அகலம், 4.50 மீட்டர் உயரம் கொண்ட இந்த மெகா பஸ்கள், பேட்டரிகளால் இயங்கும் வகையில் தயாரிக்கப்படவுள்ளது. சராசரி சாலைகளின் ஓரமாக டிராம் தண்டவாளம் போன்ற இருப்புப் பாதையில் இந்த பஸ் செல்லும்போது, சாலைகளில் ஓடும் கார்போன்ற சிறிய வாகனங்களை மோதாமல் ஏறி கடந்து செல்லும் வகையில் இந்த பஸ்களின் உடலமைப்பு இருக்கும்.
சுரங்கப்பாதை போன்ற வடிவிலான இந்த பஸ்சின் தயாரிப்பு செலவு ஒரு சுரங்கப்பாதையை கட்டுவதற்கான செலவில் ஐந்தில் ஒரு பங்காக மட்டுமே இருக்கும். ஒரே நேரத்தில் இந்த பஸ்சில் 1200 பேர்வரை பயணம் செய்யலாம்.
ஒவ்வொரு நிறுத்தத்திலும் இந்த பஸ்கள் நிற்கும்போது விமானத்தில் இருப்பதைப் போன்ற படிக்கட்டுகள் பக்கவாட்டில் இறங்கும். அதன் வழியாக பயணிகள் ஏறி, இறங்கலாம். கடந்தவாரம் சீன தலைநகர் பீஜிங்கில் நடைபெற்ற சர்வதேச வாகன கண்காட்சியில் செயல்முறை விளக்கமாக காட்சிப்படுத்தப்பட்ட இந்த பஸ், வடக்கு சீனாவில் உள்ள ஹேபேய் மாகாணத்தில் இந்த ஆண்டு இறுதியில் பரீட்சார்த்த முறையில் அறிமுகப்படுத்தப்படும் என அறிவிக்கப்பட்டுள்ளது.
மணிக்கு 60 கிமீ வேகம் வரை செல்லும் இந்த பஸ், முதல்கட்டமாக சீனாவின் கின்ஹுவாங்டாவ் என்ற இடத்தில் அமைக்கப்பட்டிருக்கும் 300 மீட்டர் நீளமுடைய பாதையில் சோதனை ஓட்ட தடத்தில் இயக்கி ஆய்வுகள் செய்யப்பட்டன.
இந்நிலையில், தற்போது இந்த பஸ்சின் சோதனை ஓட்டம் நடந்தது. இந்த பரிசோதனை வெற்றிகரமாக அமைந்ததாக சீன ஊடகங்கள் தெரிவித்துள்ளன.
வருங்காலத்தில் டிரைவர் இல்லாமல் தானாக இயங்குவது குறித்து இந்த பஸ்சை இயக்க வைக்க வல்லுனர்கள் அதற்கான முயற்சிகளில் ஈடுபட்டு வருகின்றனர். கார்களை விழுங்கியபடி செல்லும் இந்த ‘சாலை ஏர் பஸ்’ பயணிகள் மத்தியில் மிகுந்த வரவேற்பை பெற்றுள்ளது.
இந்த பஸ்சின் சோதனை வெள்ளோட்டத்தை காண..,
